ہَے ذِکر ترا گلشن گلشن سُبحان اللہ سُبحان اللہ
مصرُوفِ ثنا ہیں سَرو و سمن سُبحان اللہ سُبحان اللہ
غنچوں کی چٹک شبنم کی ضیا‘ پھولوں کی مہک بلبل کی نوا
قائم ہے تجھی سے حُسنِ چمن سُبحان اللہ سُبحان اللہ
کیا دیکھے کوئی وسعت تیری ‘ ہو کیسے بیاں عظمت تیری
عاجز ہے نظر قاصِر ہے دہن سُبحان اللہ سُبحان اللہ
مطلُوب بھی تو مقصُود بھی تو ، مسجُود بھی تو معبُود بھی تو
تو روحِ صبا تو جانِ چمَن سُبحان اللہ سُبحان اللہ
ہر نقش تری قدرت کا نشاں ‘ ہر نقش کے لب پر تیرا بیاں
ہر بزم میں تو موضوعِ سخن سُبحان اللہ سُبحان اللہ
مَیں نے جو کہا مَیں نے جو سُنا ، کچھ بھی نہ کہا کچھ بھی نہ سُنا
ہے اِس سے وَرا تیرا مسکن سُبحان اللہ سُبحان اللہ
مٹّی کو زباں دے کر اُس کو اعجازِ بیاں دینے والے
اعظؔم کو بھی دے تو فیقِ سخن سُبحان اللہ سُبحان اللہ
شاعر کا نام :- محمد اعظم چشتی
کتاب کا نام :- کلیاتِ اعظم چشتی