میری نگاہ سے مرے وہم و گماں سے دُور
میری نگاہ سے مرے وہم و گماں سے دُور
میری خِرد سے دُور مری این و آں سے دُور
راحت سے پاک رنج سے پاک اِبتلا سے پاک
ہر بیش و کم سے ہر غمِ سُود و زیاں سے دُور
حسرت سے پاک سوز سے پاک آرزو سے پاک
حاجت سے پاک عجز سے پاک امتحاں سے دُور
کون و مکاں میں صرف وُہی ایک ذات ہے
جو ہے ہر اک بشر کی چنین و چُناں سے دُور
اعظؔم وہ ایک ایسی حقیقت ہے بے نشاں
ظاہر ہے ہر نشاں سے مگر ہر نشاں سے دُور