آہ علمِ دین کا اک رازداں جاتا رہا
آہ علمِ دین کا اک رازداں جاتا رہا
ملّتِ اسلامیہ کا پاسباں جاتا رہا
اہلِ دل کا پیشوا اہلِ وفا کا رہنما
باعثِ تسکینِ آرزوئے دلاں جاتا رہا
جس کی خوشبو سے معطّر تھا دماغِ زندگی
وہ وجودِ حق نما معجز بیاں جاتا رہا
جس کی تابانی سے روشن تھا محبت کا چراغ
کاش وہ مہر منوّر ناگہاں جاتا رہا
گلشنِ معنی کے گُل خاموش کلیاں سو گوار
وائے محرومی چمن کا نگہباں جاتا رہا
میکدے پر چھا گئیں تاریکیاں مایوسیاں
بادہ کش حیران ہیں‘ پیر مغاں جاتا رہا
آنکھ روتی ہے نظر وہ غمگسار آتا نہیں
دل تڑپتا ہے کہ کیسا مہرباں جاتا رہا
غیر ممکن ہے کہ یہ خالی جگہ پُر ہو سکے
واقعہ یہ ہے کہ یکتائے زماں جاتا رہا
راستہ دشوار منزل دور دنیا راهزن
کارواں کی خیر میرِ کارواں جاتا رہا
اعظمؔ اب کیسے دِل بے چین کو آئے قرار
دل کا محرم جان کا آرام جاں جاتا رہا