اے مرادِ مصطفٰیؐ تجھ پر
اے مرادِ مصطفٰیؐ تجھ پر عمرؓ لاکھوں سلام
تو سبھی کا دلربا تجھ پر عمرؓ لاکھوں سلام
نام سنتے ہی ترا شیطاں رفو چکر ہوا
دبدبہ اتنا ترا تجھ پر عمرؓ لاکھوں سلام
ہیں ستاروں سے کہیں بڑھ کر کے تیری نیکیاں
تو ہے اتنا پارسا، تجھ پر عمرؓ لاکھوں سلام
تھم گیا بھونچال فوراً، ارضِ طیبہ پر جونہی
اک پڑا دُرّہ ترا تجھ پر عمرؓ لاکھوں سلام
گال پر تیرے نشاں تھے آنسوؤں کے، خوف سے
تو امام الاتقیا تجھ پر عمرؓ لاکھوں سلام
کر دیا انصاف قائم دے کے سب کے سامنے
اپنے بیٹے کو سزا تجھ پر عمرؓ لاکھوں سلام
بعد میرے گر نبیؐ ہوتا نبیؐ نے برملا
نام بس تیرا لیا تجھ پر عمرؓ لاکھوں سلام
یہ جلیلِ بے ہنر بھی کاش تک لیتا کہیں
خواب میں جلوہ ترا تجھ پر عمرؓ لاکھوں سلام