علی ؑ مولائے رندانِ جہاں ہے
علی ؑ مولائے رندانِ جہاں ہے
علی ؑ نورِ ھدیٰ کا رازداں ہے
علیؑ شیدا مُحمّد ؐ مصطفےٰ کا
علیؑ گویا مکینِ لامکاں ہے !
علیؑ کی ضرب ہے ضربِ الٰہی
علیؑ کا نام نصرت کا نشاں ہے
علی ؑ کے ہاتھ کو کہیے ید اللہ !
علیؑ من کنتُ مولا کا بیاں ہے
علؑی ہے کربلاؤں کی حقیقت
علیؑ کی داستاں کیا داستاں ہے
علی ؑ ساجد ، علی مسجُودِ ھستی !
علی ؑ سجدوں کی عظمت کا نشاں ہے
علی ؑ کی یاد ہے ہستی بہاراں ،
علی ؑ سے بغض عرفاں کی خزاں ہے
علی ؑ شاہِ نجف شاہِ ولایت
علی ؑ مولا ، امامِ ہر زماں ہے
علیؑ غالب علیٰ ارض و سمٰوات
علیؑ دامادِ شاہِ ہر جہاں ہے
علی ؑ مشکل کشا ظلِّ نبوّت !
علی ؑ بابِ حقیقت بے گماں ہے
علی ؑ خیبر شکن شیرِ الٰہی
علی ؑ شرع و طریقت کا بیاں ہے
علی ؑ ہے رھنما ئے جن و آدم
علی ؑ لاریب میرِ کارواں ہَے
علی ؑ نے دین کو سینچا لہو سے
علی ؑ باغِ نبی ؐ میں گلفشاں ہے
علی ؑ کی عین کے گوہر نرالے
علی ؑ خود معدن ِ علم ِ نہاں ہے
علی ؑ قادری علی قرآن ِ ناطق
علی ؑ کا نور بر نوکِ سناں ہے
علی ؑ ہے ساقیِ تسنیم و کوثر
علی ؑ خود تشنہ لب تشنہ زباں ہَے
علی ؑ ہے لافتی ٰ لاسیف والا
علیؑ لیکن رضا کا پاسباں ہے
علی ؑ کو میں عُلیٰ کہدوں و لیکن
علی ؑ سجدے میں خود تسبیح خواں ہَے
علی ؑ کے فیض سے لاہور روشن
علی ؑ کے دم سے اجمیری نشاں ہے
علی ؑ کا نام ہے کلیر میں صابرؒ
علی ؑ سے خسرو ِ شیریں بیاں ہَے
علی ؑ کا ہی نظامِ دہلوی ہے
علی ؑ کی لاٹ ہی قطبی نشاں ہَے
علیؑ خواجہ فرید الدیںؒ کی منزل
علی ؑ پاکِ پتن کی جانِ جاں ہَے
علی ؑ کے نام سے مولائے رومی
علی ؑ تبریزؒ کا سرِّ نہاں ہے !
علی ؑ کا فقر ہے فخرِ مُحمّد ؐ
علی ؑ لحمک لحمی جسم و جاں ہے
علی ؑ ہے کاشفِ رازِ حقیقت
علی ؑ وحدت میں اک کثرت نہاں ہے
علیؑ ہے شارحِ شانِ نبوّت
علی ؑ کا نام ہی حُسنِ بیاں ہے
علی ؑ ہے مرکزِ پر کارِ ھستی
علیؑ جب بھی جہاں ہے درمیاں ہے
علی ؑ سے اولیا ء کی زندگی ہے
علی ؑ کی ذات ہی روحِ رواں ہے
علیؑ کی یاد ہَے واصف علی کو
علی ؑ خود اس زمیں کا آسماں ہَے !