دل رُبا دل نشیں معینُ الدّیںؒ
دل رُبا دل نشیں معینُ الدّیںؒ
بھُولتے ہیں کہیں ، معینُ الدّیںؒ؟
واقفِ سرِّ دیں معینُ الدّیںؒ
نازِ اہلِ یقیں ، معینُ الدّیںؒ
زُبدۃُ العارفیں ، معینُ الدّیںؒ
حق جہاں ہے وہیں ، معینُ الدّیںؒ
ہو گئی اُن سے دین کی تجدید
رُوحِ دینِ مُبیں ، معینُ الدّیںؒ
رہبرِ سالکانِ راہِ طلب
منزلِ اہلِ دیں ، معینُ الدّیںؒ
ہم نے ہر سُو نگاہ دوڑائی
کوئی تُم سا نہیں ، معینُ الدّیںؒ
جس نے چُومے ترے قدم اک بار
ہے فلک وہ زمیں ، معینُ الدّیںؒ
لوحِ ہستی پہ جگمگاتے ہیں
بن کے نقشِ حسِیں ، معینُ الدّیںؒ
تُم سے روشن ہے جادہء اُلفت
سوزِ جاں کے امیں ، معینُ الدّیںؒ
بات ہر اک تمہاری مثلِ گُہَر
لفظ اک اک نگیں ، معینُ الدّیںؒ
غم و آلام نے جہاں گھیرا
یاد آئے وہیں ، معینُ الدّیںؒ
خادمِ آستانِ عالی ہے
یہ نصیرِؔ حزیں ، معینُ الدّیںؒ