جرات، فصیل جبر گرانے کو چاہیے
جرات، فصیل جبر گرانے کو چاہیے
اب بھی حسین سار ے زمانے کو چاہیے
سجدہ اگر امام بھی ہو مقتدی بھی ہو
سجدے کے ساتھ سر بھی کٹانے کو چاہیے
اے راستے کی خاک یہ احسان تو ہی کر
زینب کے سر پہ چادر اڑھانے کو چاہیے
کاٹی گئی تھی خون سے گردن یزید کی
تلوار پھر وہ دھار لگانے کو چاہیے
نیزوں پہ سر، جلے ہوئے خیمے ، اداس شام
اب اور کیا نبیؐ کے گھرانے کو چاہیے
تھوڑے سے خوں سے نام مٹانا ہے ظلم کا
تھوڑا سا خوں چراغ جلانے کو چاہیے
جس میں مصّوروں کا لہو ہو بھرا ہوا
تصویر ایسی آئنہ خانے کو چاہیے
دھن کی تو ٹوٹتی ہی رہیں گی تجوریاں
اک چور غیرتوں کے خزانے کو چاہیے