خاتون جنت دے وانگوں کون
خاتون جنت دے وانگوں کون امت تے احسان کرے
سرکار دا دین بچاون لئی سب کنبے نوں قربان کرے
جنہوں ویکھ کے سارے نبیاں دا سردار کھڑا ہوجاندا اے
کیہہ طاقت قلم نمانی دا زہرا دی شان بیان کرے
مک جاندی رات نہ مکدا اے سجدہ سرکار دی بیٹی دا
رو رو کے کیہڑا امت دی مشکل نوں انج آسان کرے
چکی دی مشقت ہتھاں تے جنت دی حکومت قدماں وچ
فاقے دی مصیبت یاد نئیں ہر دم ورد قرآن کرے
جھک جان نگاہواں محشر وچ آونا ایں نبی دی بیٹی نے
کیہہ حشر ہووے گا محشر جدوں والی ایہہ اعلان کرے
جدے سر دا سائیں حیدر اے جدا باپ محمدؐ سرور اے
تا حشر ظہوریؔ نوں مولا اوہدی چوکھٹ دا دربان کرے