کیوں کر نہ ہوں معیارِ سخا فاطمہ زہرا

کیوں کر نہ ہوں معیارِ سخا فاطمہ زہرا

ہیں دخترِ محبوبِؐ خدا فاطمہ زہرا

---

ہیں نُورِ محمدؐ بخدا ، فاطمہ زہرا

محشر میں ہیں رحمت کی گھٹا فاطمہ زہرا

---

مادر ہیں وہ زینب کی حسین اور حسن کی

ہیں آلِ محمدؐ کی رِدا فاطمہ زہرا

---

پُوچھا جو کسی نے کہ ہیں خاتونِ جِناں کون ؟

آہستہ سے رضواں نے کہا ، فاطمہ زہرا

---

ایک ایک نظر حاملِ صد لُطف و کرم ہے

ہیں وارثِ فیضان و عطا فاطمہ زہرا

---

ہے اُن کا ہے اکسیر پئے ردِّ بلیّات

ہیں درد کی میرے بھی دوا فاطمہ زہرا

---

اوصافِ حمیدہ میں وہ ممتاز ہیں سب سے

ہیں جُملہ خواتیں سے جُدا فاطمہ زہرا

---

دیتی ہے وفائے حَسَنَین اِس کی شہادت

ہر لمحہ تھیں راضی بہ رِضا فاطمہ زہرا

---

اب تو ہے نصیؔر اُں سے عقیدت کا یہ عالَم

ہر حال میں ہے وِرد مِرا "فاطمہ زہرا "

کیوں کر نہ ہوں معیارِ سخا فاطمہ زہرا