مِلی نہ دولتِ عرفاں بُجز نگاہِ علیؑ
مِلی نہ دولتِ عرفاں بُجز نگاہِ علیؑ
امینِ رازِ نبوّت ہے بارگاہِ علیؑ
پڑی ہے رُوئے نبی پر کچھ اس عقیدت سے
کہ آج تک نہ کسِی پر اُٹھی نگاہِ علیؑ
فدائے طُور ہو کیونکر گدائے کُوئے نجف
ہزار طُور بداماں ہے جلوہ گاہِ علیؑ
گناہ گاروں کی بخشش کے دو وسیلے ہیں
نگاہِ مُصطفوی لُطفِ بے پناہ علیؑ
خوشا نصیب کہ میرے لِیے اُڑا لائی
ہوائے کُوئے محمّد غُبارِ راہِ علیؑ
ہے اُن کے ذکر سے آرائشِ سخن ورنہ
مِرے خیال سے برتر ہے عز و جاہِ علیؑ
اُٹھے گا عرصۂ محشر میں سُرخ رُو اعظؔم
گدائے کُوچۂ شبیّر و خیر خواہِ علیؑ