آگیا مرکز میرے ایمان دا
آگیا مرکز میرے ایمان دا
آگیا آج چین ساڈی جان دا
بھر گیا گھر آمنہ دا نور تھیں
خاک خاکی کہن والا چھان دا
نعت ہے ساری نبی مختار دی
ورقہ ورقہ پھول لئو قرآن دا
بھر دے مولا جھولیاں آج سب دیاں
واسطہ ای عرش دے مہمان دا
واہ حلیمہ بھاگ تیرے واہ وا
جھولی تیری چن ہے رحمان دا
یا محمد یا محمد کہہ لویں
موڑنا چاہویں جے رُخ طوفان دا
میرے سوہنے مصطفے دی شان تے
سلسلہ مگدا اے ہر اک شان دا
کی سُناواں حال اُس محبوب نوں
اوه دلاں دے حال سارے جان دا
نور والے نعت پڑھدے نور دی
رنگ پیلا پے گیا شیطان دا
پلدے پئے نے ساکنانِ دو جہاں
کھا کے صدقہ اوہدے دسترخوان دا
اشک پلکاں تے سجا لو دوستو
ہو گیا ویلا اے اُس دے آن دا
مشکلاں آسان سب دیاں ہونیاں
آگیا ویلا نجاتاں پان دا
جس دے وچ ہستی دے سب مضمون نے
نام کی رکھاں میں اُس عنوان دا
جو سجاندا محفل محبوب نوں
حشر تک صائم اوه موجاں مان دا