آج عیدوں کی عید کا دن ہے
آج عیدوں کی عید کا دن ہے
انتہائے نوید کا دن ہے
۔ہیچ ہیں جس کے سامنے کونین
وہ فلک سے زمین پر اترا
زندگی کی حسین آنکھوں میں
وقت کا نکتہء نظر اترا
اُسوہء مصطفؐےٰ کے شیشے میں
حق تعالیٰ کی دید کا دن ہے
ہر تمنا کے لب پہ خندہء نور
ہر نفس ہے بہشت کا جھونکا
ہر گھڑی اسکی ہر صدی اس کی
رستے رستے ہجوم آنکھوں کا
چودہ سو سال کی حویلی میں
ایک جشن جدید کا دن ہے
روشنی کا ہواؤں کا عادی
عدل کا چاہتوں کا شہ پارہ
دل کی رونق ، ضمیر کی آواز
شام کا چاند ، صبح کا تارہ
کھُل گئے رحمتوں کے دروازے
ہر طلب ہر امید کا دن ہے
جانتے ہیں مقام حمدو ثنا
صاحبان شعور آئے ہیں
اے خدا بارگاہ میں تیری
امتّیِ حضورؐ آئے ہیں
عشق کا چاہیے صلہ ان کو
فرد لکھ لی، رسید کا دن ہے
بیٹھ کر اپنے آسمانوں پر
آپ کے غار تک پہنچنا ہے
ساری دنیا مثال دے جس کی
ایسے کردار تک پہنچنا ہے
اپنے اپنے وجود سے گویا
اپنی اپنی کشید کا دن ہے
چشم و دل آج آئنے کی طرح
عشق کے دستِ دیدہ زیب میں ہیں
نسبتِ سرورِ دو عالم کے
سارے سکّے ہماری جیب میں ہیں
آج ایمان کی دکانوں پر
آخرت کی خرید کا دن ہے