آئو سب کہہ دیں بہار آئی ترےؐ آنے سے
آئو سب کہہ دیں بہار آئی ترےؐ آنے سے
’’دل کی دنیا میں بہار آئی ترےؐ آنے سے‘‘
کر کے ہر سمت چراغاں وہ تری آمد پر
کہتی ہیں شمعیں بہار آئی ترےؐ آنے سے
نام سے تیرے کھلے جن کے مقدّر آقاؐ
کیوں نہ وہ سمجھیں بہار آئی ترےؐ آنے سے
مدتوں بعد گلوں کو ہے ملی رعنائی
جھومیں، لہرائیں بہار آئی ترےؐ آنے سے
گنگ لہجے کی شکایت ہے اگر لوگوں کو
مل کے سب گائیں بہار آئی ترےؐ آنے سے
بزمِ کونین محبت سے سجانے والے!
سب کریں باتیں بہار آئی ترےؐ آنے سے
تیرگی جن کی مٹی نور سے انؐ کے طاہرؔ
وہ کہیں راتیں بہار آئی ترےؐ آنے سے