آوی جا سوہنیا ، آوی جا سوہنیا
صدقہ شبیر سرکار دا آوی جا
واسطہ تینوں تیری مسیحائی دا
حال تک اپنے بیمار دا آوی جا
غم دیاں بدلیاں ہر طرف چھا گئیاں
راہواں تک تک کے اکھیاں وی پتھرا گئیاں
یا حبیب خدا اے میرے دلربا
بھکھا عالم اے دیدار دا آوی جا
مُرتضائی تیری مُصطفائی تیری
تُوں خُدا دا تے ساری خُدائی تری
تیرا وسدا مدینہ رہوئے سوہنیا
صدقہ طیبہ دی گلزار دا آوی جا
واسطہ تینوں زینب دی فریاد دا
کرنا امداد ویلا اے امداد دا
دُور کر دے بلا بہر مشکل کشا
صدقہ حیدر دی تلوار دا آوی جا
پھل زخماں دے سارے سجائے نے میں
ہار ہنجواں دے رورو بنائے نے میں
تیرے کمبل مزمل توں قربان میں
جھنب کملی دی ہن مار دا آوی جا
توں میرا دلربا ، توں میرا آسرا
ہور کوئی وی نہیں میرا تیرے سوا
دے رہیا تیرا صائم صدا تے صدا
واسطہ ربّ شار دا آوی جا
شاعر کا نام :- علامہ صائم چشتی
کتاب کا نام :- کلیات صائم چشتی