ایک عجیب کیفیت قلب و نظر کے ساتھ ہے
ایک عجیب کیفیت قلب و نظر کے ساتھ ہے
ذکر حبیبِؐ پاک کا دیدۂ تر کے ساتھ ہے
اُنؐ کی نوازشات سے سہل ہُوئی ہے زندگی
دستِ کرم قدم قدم دست نگر کے ساتھ ہے
ان کی نگاہِ لُطف سے دُور ہوں دُور تر نہیں
روضۂ پاک ہر نفس میری نظر کے ساتھ ہے
یاد سہارا بن گئی ، نام وسیلہ ہوگیا
میری زبان پر دُعا اپنے اثر کے ساتھ ہے
دُور سے تک رہا ہوں میں راہ روانِ شوق کو
میں تو نہیں میری نظر گردِ سفر کے ساتھ ہے
آپؐ کی ذاتِ پاک ہے وجہِ قیامِ کائنات
سلسلہ برگ و بار کا جیسے شجر کے ساتھ ہے
عرضِ ہُنر کو بھی حنیفؔ میں نے کیا ہے عرضِ حال
نعت میں رنگِ شاعری خُونِ جگر کے ساتھ ہے