ایس دِل دے کورے کاغذ تے سوہنی تصویر بناواں مَیں
ایس دِل دے کورے کاغذ تے سوہنی تصویر بناواں مَیں
طیبہ دے نظارے لبھ لبھ کے تصویر دے وچ سجاواں مَیں
بھر دیاں میں رنگ مدینے دے اک ایسانقشہ کھچ دیواں
ایس اُجڑے سُونے دیس اندر اِک وکھری جھوک وساواں مَیں
کِتے جلوے سوہنے گنبد دے کِتے نور و نور منارے نے
اوہ سوہنی جالی روضے دی بڑے چاواں نال وکھاواں مَیں
میں روپ اوس سوہنے ویہڑے داکینویں لفظاں وِچ بیان کراں
ایہہ عرش بریں داسایہ اے ایتھوں نظراں کِویں ہٹاواں مَیں
اوہ سوہنیاں پیاریاں گلیاں نے تے سجیاں سجیاں راہواں نے
نہیں ویکھ کے ناز دا جی رجدا ایتھے مُڑ مُڑ پھیرے پاواں مَیں