آپؐ کے لفظوں کی خوشبو اور صدا میں قید ہوں
آپؐ کے لفظوں کی خوشبو اور صدا میں قید ہوں
اِک ستارے کی طرح روشن خلا میں قید ہوں
آپؐ کے لطف و کرم کی انتہا میں قید ہوں
کتنا خوش قسمت ہوں میں کیسی فضا میں قید ہوں
میرے سر پر ایک سایہ ہے رِدائے نور کا
میں فصیلِ گنبدِ صلِّ علیٰ میں قید ہوں
کر نہیں سکتا مَیں اِس جنت کی وسعت کو عبور
میں خیالِ سیّدِ ہر دوسرا میں قید ہوں
میں غلام ابنِ غلامِ خواجۂ ارض و سما
گنبدِ خضرا کو مَس کرتی ہوا میں قید ہوں
گِرتا پڑتا کاش جا پہنچوں مدینے کے قریب
اڑتی خوشبو کی طرح اپنی دُعا میں قید ہوں
میرے ہونٹوں پر فرشتوں کی طرح انجؔم درُود
میں فرشتوں کی طرح غارِ حرا میں قید ہوں