آپؐ کے صدقے زمیں پر روشنی بھیجی گئی
آپؐ کے صدقے زمیں پر روشنی بھیجی گئی
کتنے ہی افسردہ لوگوں میں خوشی بھیجی گئی
آپؐ کی آمد پہ مہکائی گئی یہ کائنات
آپؐ کی آمد پہ خوشبو کی گھڑی بھیجی گئی
آپؐ کی آمد پہ جل اٹھے محبت کے چراغ
آپؐ کی آمد پہ شمعِ دوستی بھیجی گئی
آپؐ کی آمد پہ سورج بھی نیا لایا گیا
آپؐ کی آمد پہ دنیا بھی نئی بھیجی گئی
آپؐ کی آمد پہ در کھولے گئے سب عِلم کے
آپؐ کی آمد پہ صبحِ آگہی بھیجی گئی
میرے جیسے بھی ہوئے ابرِ کرم سے فیضیاب
میرے جیسوں کے لیے بھی زندگی بھیجی گئی
آپؐ کی توصیف کی خاطر ہوئے ایجاد لفظ
آپؐ کی خاطر زمیں پر شاعری بھیجی گئی
کتنے ہی بیمار ذہنوں کو ملی انجؔم شفاء
کتنے ہی بیمار ہونٹوں پر ہنسی بھیجی گئی