اے محبِّ رونقِ عالمیں! ہو عطا تبسمِ مصطفٰی
اے محبِّ رونقِ عالمیں! ہو عطا تبسمِ مصطفٰی
کھِل اٹھے گا قلبِ حزیں مرا جو ہُوا تبسمِ مصطفٰی
کھِچا جا رہا ہے سبھی کا دل سوئے شہرِ سیدِ عالمیں
گویا چل رہی ہے لئے ہوئے یہ صبا تبسمِ مصطفٰی
غضبِ خدا کو جزاء کے دن بھلا کون ٹالے گا جان لو !
بخدا تبسمِ مصطفٰی بخدا تبسمِ مصطفٰی
میں اسیرِ زلفِ حسِین رُو بھلا کیا کروں گا بہشت کا
مجھے گلسِتانِ جِناں میں گر نہ ملا تبسمِ مصطفٰی
ہے نسیمِ صبحِ ارم حسِیں، ہے بجا مگر یہ بتا ذرا
اِسے ناز ہے تو کہاں کا ہے ؟ ہے بھلا ؟ تبسمِ مصطفٰی
ارے جائو نا اے طبیبِ من ! یونہی بے سبب نہ کھپائو سر
کہ مریضِ ہجرِ حضورؐ کی ہے دوا تبسمِ مصطفٰی
یونہی میرے قلبِ اداس کو لبِ مصطفٰی کی طلب نہیں
سرِ حشر خالقِ حشر کی بھی رضا تبسمِ مصطفٰی
ہو سرِ ترازوئے عدل کیوں بھلا خوف مجھ کو حِساب کا
کہ فرشتے مجھ سے کہیں گے آ اِدھر آ تبسمِ مصطفٰی