اے احمدِؐ مُرسل نورِ خدا
اے احمدِؐ مُرسل نورِ خدا ، تری ذاتِ صفا کا کیا کہنا
پڑھتے ہیں ملائک صلِّ علیٰ ‘ تری شانِ عُلا کا کیا کہنا
چہرے پہ ہیں قرباں شمس و قمر زلفوں پہ تصدّق شام و سحر
رُخساروں پہ ٹھہرے کِس کی نظر‘ ترے مُنہ کی جِلا کا کیا کہنا
سو گند ہے چہرے کی شمس وضحیٰ ‘ وَاللَّیل ہے تیری زُلف ِ دوتا
سینے کی صِفت ہے اَلم نشرح‘ تِرے دِل کی فضا کا کیا کہنا
وَالُعَصْر ہے تیرے زماں کی قسم‘ وَلَعَمُوک ہے تیری جاں کی قسم
وَالْبَلد ہے تیرے مکاں کی قسم ‘ تیرے رہنے کی جا کا کیا کہنا
جبریلؑ رہے‘ بُرّاق تھکے ‘ رَف رَف بھی آگے جا نہ سکے
رَبّ اُدْنُ مِنِّیْ حَبِیْبِیْ کہے‘ ترے قُربِ خُدا کا کیا کہنا
کھایا نہ کبھی بھی جی بھر کر ‘ خود بھُوکے رہے باندھے پتھر
اَوروں کو دیا جھولی بھر بھر ‘ ترے دَستِ عطا کا کیا کہنا
سائل جو کبھی دَر پر آیا‘ خالی نہ کبھی اس کو پَھیرا
جو اس نے مانگا وہی دیا ‘ تِری جُود و سخا کا کیا کہنا
بدبخت جو تھے وہ نیک ہوئے ‘ لڑتے تھے ہمیشہ جو ایک ہوئے
تو نے جھگڑے سارے میٹ دیئے ‘ ترے فہم و ذکا کا کیا کہنا
کفّار نے کیا کیا کچھ نہ کیا ، پَر تو نے نہ کی کچھ ان پہ جفا
ربِّ اِھْدِ قَوْمیْ حق سے کہا ، ترے مہر و وفا کا کیا کہنا
صابرؔ سے کہاں ہو مَدح تری ‘ ترے خلق میں ہے قرآن سبھی
جَب تیری ثنا اللہ نے کی ‘ پھر مجھ سے گدا کا کیا کہنا