اے سکونِ قلب مضطر اے قرارِ زندگی
اے سکونِ قلب مضطر اے قرارِ زندگی
اے امینِ رازِ فطرت، اے بہارِ زندگی
تیری ہر ہر جنبشِ لب برگ و بارِ زندگی
تو دیارِ عش میں ہے شہریارِ زندگی
تیرے قدموں کی بدولت تیری آمد کے طفیل
گلستاں ہی گلستاں ہے خارزارِ زندگی
تیرا قربِ خاص پا کر تیرے دستِ پاک میں
سنگریزے بن گئے ہیں شاہکارِ زندگی
جس نے پائی تیری نسبت ہوگیا وہ ذی وقار
اے فروغِ ادمیت، اے وقارِ زندگی
نعت کیا ہے در حقیقت نغمہ زار زندگی
کیونکہ جس کی نعت ہے وہ ہے قرارِ زندگی
شاعرانِ حُسنِ فطرت ، صاحبانِ درک و فہم
ہے قدم بوسی میں ہر اک وضع دارِ زندگی
درس تیرا ظالموں سے جنگ ، مظلوموں سے پیار
کتنی سادہ ہو گئی ہے رہ گذارِ زندگی
آدمی کو آدمی سے پیار کا نسخہ دیا
تو طبیبِ خلق ہے ، تیمار دارِ زندگی
تو نے آکر دی نگاہوں کو بصیرت حُسن کی
ورنہ تھی محدود لفظوں میں ، بہارِ زندگی
تو نے صحرائے تخیل میں لگائے گلستاں
اور چٹانوں سے نکالے آبشارِ زندگی
گونج اُٹھے نغمے لگائی تو نے جب مضرابِ عشق
بربطِ فطرت پہ تھا خاموش تارِ زندگی
بے خبر دنیا و مافیہا سے تو نے کردیا
کیا شرابِ زندگی ہے ، کیا خمارِ زندگی
روح و جاں کی سلطنت پر حکمرانی ہے تری
ہم غلامِ عشق ہیں ، تو تاجدارِ زندگی
عشق کی دیوانگی کے سامنے سب ہیچ ہیں
توڑ دیتی ہے محبت، ہر حصارِ زندگی
تیرے پائے ناز کا اک لمس پا کر ہے رواں
چھن چھناتی ، گنگناتی جوئبارِ زندگی
تیری توصیف و ثناء و مدح سے آراستہ
ہے ادیبِؔ خوش بیاں کا نغمہ زارِ زندگی