بارِ عصیاں سر پہ ہے بیچارگی سے آئے ہیں
بارِ عصیاں سر پہ ہے بیچارگی سے آئے ہیں
دستگیرِ بے کساں ہم بے کسی سے آئے ہیں
کتنے درماندہ مسافر کارواں در کارواں
آپؐ کے قدموں میں راہِ گمرہی سے آئے ہیں
ہم جہاں دار و جہاں بان و جہاں آرا رہے
یہ سلیقے آپؐ ہی کی پیروی سے آئے ہیں
جتنے کسریٰ جتنے جسم آئے ہیں اے خُلقِ عظیمؐ
آپؐ کی حلقہ بگوشی میں خوشی سے آئے ہیں
آپؐ نے تو ہر طرح سکھلائے آدابِ حیات
ہم پہ یہ ادبار اپنی خُود سری سے آئے ہیں
آپؐ سب کچھ جانتے ہیں کیسے ہو عذرِ گناہ
سر ندامت سے جھُکائے عاجزی سے آئے ہیں
پا برہنہ ، پا شکستہ ، دِل گرفتہ ، غم زدہ
جانِ رحمت ہم دیارِ بے کسی سے آئے ہیں
فقر میں ایسی بلندی ، عجز میں ایسا شکوہ
اُنؐ کے آگے کج کلہ بھی عاجزی سے آئے ہیں
نذرِ آقاؐ ہوں تو ان کی قدر بھی ہو کچھ حنیفؔ
اشک آنکھوں میں جو دِل کی بیکلی سے آئے ہیں