بے شک، ہیں بہت، کم نہیں احسانِ مدینہ
بے شک، ہیں بہت، کم نہیں احسانِ مدینہ
اک یہ بھی ہو بن جاؤں میں مہمانِ مدینہ
کب ہو گی شہا میری طرف چشمِ عنایت
میں کب سے لیے بیٹھا ہوں ارمانِ مدینہ
تسلیم بھی ہے کعبے کے جزدان کی عظمت
افضل ہے مگر دامنِ سلطانِ مدینہ
میں بھی ہوں تمنائی تِرا رحمتِ عالم
مجھ کو بھی بنا لے کبھی مہمانِ مدینہ
آزاد رہیں گے وہ جہنم کی سزا سے
دنیا میں رہے ہیں جو اسیرانِ مدینہ
عالم میں کہیں کوئی نہیں ہے تِرے جیسا
اے جانِ مدینہ، شہِ خوبانِ مدینہ
لگ جائیںگے اے چاند تِرے ہوش ٹھکانے
آ دیکھ ذرا، ذرّۂِ تابانِ مدینہ
ہر صبح و مسا رزقِ سخن میں ہے اضافہ
جب سے ہیں شفیقؔ آپ ثنا خوانِ مدینہ