بُلا لو پھر ہمیں شاہِ عربؐ مدینے میں
بُلا لو پھر ہمیں شاہِ عربؐ مدینے میں
تمہیؐ کو تمؐ سے کریں گے طلب مدینے میں
درِ حضورؐ پہ جا کر ہے مانگنا اعزاز
بغیر مانگے ملا ورنہ سب مدینے میں
زمیں پہ اشک نہ گرنے دیے فرشتوں نے
میں اشکبار ہوا جا کے جب مدینے میں
یہ پوچھنا ہے مدینے کے زائرو! جا کر
مجھے حضورؐ بلائیں گے کب مدینے میں
ادب سے رہنا مدینے میں اے دلِ مضطر
سگانِ در کا ہے واجب ادب مدینے میں
نگاہ و دل سے ترےؐ بام و در کو بوسے دوں
کروں نہ دوسرا کوئی کسب مدینے میں
ہو کیوں نہ نور کی بارش ہر اک سمے اشفاقؔ
کہ جلوہ ساماں ہیں محبوبِؐ ربّ مدینے میں