چھڑ روندیاں جاون والڑیا دو گھڑیاں آجا کوئی گل نئیں
چھڑ روندیاں جاون والڑیا دو گھڑیاں آجا کوئی گل نئیں
کچھ گلاں باغ جنان دیاں اج آکے نا جا کوئی گل نئیں
اسیں راہواں تیریاں تکدے آں دِل روندا بول نہ سکدے آں
کدی خواب چہ آکے محبوبا ٹھنڈ سینے پاجا کوئی گل نئیں
اکھ روندی دل کرلاندا اے اک پل وی چین ناں آندا اے
اس اپنے پیار دی محفل نوں اک وار سجا جا کوئی گل نئیں
اساں رو رو ہاڑے کر دیاں دے نہ جیوندیاں تے ناں مردیاں دے
دیدار دی خیرات عطا کر کے سب دکھڑے مکا جا کوئی گل نئیں
کتے دل رووے کتے اکھ رووے کوئی بہہ کے سب توں وکھ رووے
ایہناں اکھیاں روندیاں سکدیاں نوں دیدار کراجا کوئی گل نئیں
اسیں سوہنیا دُکھڑے جر دے آں اسیں اج وی اڈیکاں کر دے آں
چن تیرے باہجھ ہنیر پیا آ چانن لا جا کوئی گل نئیں
سب پھل زخماں دئے دھو لئے نے ہنجواں دے ہار پرو لئے نے
ہُن صائم، دل دی سیج آتے جلوہ فرما جا کوئی گل نئیں