دل دیاں سدھراں پوریاں ہوون من دا مقصد پاواں میں
دل دیاں سدھراں پوریاں ہوون من دا مقصد پاواں میں
یاد نبی دی سینے لا کے شہر مدینے جاواں میں
جس دے ہجر چ روندیاں روندیاں میری عمر وہا گئی اے
اوس دِلاں دے محرم تائیں دل دا حال سناواں میں
قدم قدم تے سجدے دیواں یار جتھوں دی لنگھدا سی
چُم کے جالی رحمت والی سینے دے نال لاواں میں
چھیتی وقت لیاوے مولا دیکھاں گنبد خضری نوں
اٹھے پہر نے ایہو عرضاں ایہو کراں دعاواں میں
جے اک واری کرم کما کے سد لئے سوہنا روضے تے
وار دیاں جند جان سجن توں پھیر ناں مُڑ کے آواں میں
کملی والیا کرم کما کے سُن لے میری زاری نوں
تیرے باہجھوں پھٹ جگر دے کس نوں ہور وکھاواں میں
توں ایں دردی سب دُکھیاں دا کرم کریں ہن صائم تے
تڑف تڑف دیدار دے باہجھوں روندا ای ناں مر جاواں میں