دل سے جو غلامِ شہِ ذیشاں نہیں ہوگا
دل سے جو غلامِ شہِ ذیشاں نہیں ہوگا
واللہ کبھی خُلد کا مہماں نہیں ہوگا
کامل کبھی اُس شخص کا ایماں نہیں ہوگا
گستاخِ نبی سے جو گُریزاں نہیں ہوگا
گر سامنے اُن کا رُخِ تاباں نہیں ہوگا
مرنا بھی ہمارے لئے آساں نہیں ہوگا
یادِ شہِ بطحا سے جو دل ہوگا مُزین
آباد رہے گا کبھی ویراں نہیں ہوگا
آقا کی محبت میں گزارے جو شب و روز
وہ گور میں محشر میں پشیماں نہیں ہوگا
سرکار کرم طیبہ سے میں دُور پڑا ہُوں
کب تک مرے دُکھ درد کا درماں نہیں ہوگا
میں سخت گنہ گار ہوں لِلٰہ شفاعت
رحمت کا شہا آپ کی نقصاں نہیں ہوگا
محبوبِ خدا کو جو کوئی دل سے پُکارے
طوفان کی موجوں میں وہ غَلطاں نہیں ہوگا
رحمت کی بہار آئے مرے اُجڑے چمن میں
کیا مجھ پہ مرے شاہ یہ احساں نہیں ہوگا
دے کے نہیں لینا ہے کریموں کا طریقہ
مرزا ترا زاِئل کبھی ایماں نہیں ہوگا