دِل اُسے چاہے زباں اس کی ثنا خوانی کرے
دِل اُسے چاہے زباں اس کی ثنا خوانی کرے
جِس کے در پر بیٹھنے والا جہانّبانی کرے
تِیرہ بختی کو بنادے مالکِ صُبحِ یقیں
اور بگولوں کے حوالے شمعِ ایمانی کرے
چشمِ قاتل میں کھِلادے پھُول جِس کی روشنی
جس کا اندازِ فصاحت ، سنگ کو پانی کرے
آنے والے ہر زمانے کا اکیلا پیش رَو
جِس کا اِستقبال کُل تارِیخ اِنسانی کرے
گردنِ آفاق میں ہیں تختیاں ہر سانس کی
تر جمہ ہر اِک ادا کا نُطقِ قُرآنی کرے
نا خدائے مشرق و مغرب کا لے دُوں نام اگر
میری کشتی کی حفاظت آپ طغیانی کرے
آج کا حسّان بِن ثابت، مظفّرؔ وارثی
مُلکِ حمدو نعت میں بے تاج سُلطانی کرے