دلاں دے ہوگئے سودے ترے دیدار دی خاطر
دلاں دے ہوگئے سودے ترے دیدار دی خاطر
زمانہ سارا چھڈیا اے اساں اک یار دی خاطر
کوئی عقبیٰ مغر دوڑے، کوئی دنیا نوں لبھدا اے
اساڈی زندگی یارو بس اک دلدار دی خاطر
غماں دی گُوہڑی چھانویں بیٹھ کے خوشیاں مناندے نیں
ایہہ عاشق بہت کجھ کردے جمالِ یار دی خاطر
کسے پروانے توں ایہہ پچھیا سڑ کے تے کیہہ لبھدا
کہیا اوہنے اوہ بے سمجھا وصالِ یار دی خاطر
سجن دی جِت دا کوئی مزا ساڈے توں آ پُچھے
اساں تے بازی لائی سی بس اپنی ہار دی خاطر
ظہوریؔ تیرے توں ظاہر ایہدا اپنا تے کُجھ وی نئیں
زباں میری بیاں تیرا، ترے اظہار دی خاطر