دلوں میں ارضِ بطحا کی جو لے کر آرزو نکلے
دلوں میں ارضِ بطحا کی جو لے کر آرزو نکلے
بٹھایا سب نے آنکھوں پر ، بڑے با آبرو نکلے
سُنایا دردِ دل اُن کو تو سینہ ہو گیا ٹھنڈا
ہوئی چشمِ کرم اُن کی تو ہوکر سُرخرو نکلے
مدینے میں اجل آئے ، وہیں پر ہو لحد میری
دلِ مُضطر میں پوشیدہ ، یہی اِک آرزو نکلے
لبوں پر دم ہو جب میرا ،ترا دیدار ہو جائے
کہ دُنیا سے جو ہو رُخصت تو بندہ مشکبو نکلے
زمین و آسماں میں جو،سبھی رحمٰن کے بندے
جو طاعت میں ہوئے کامل وہی پھرعبدہٗ نکلے
مہینہ آ گیا شاہا ! ترے دُنیا میں آنے کا
جلوس آقاْ مُحبّت کے جہاں میں کُو بکُو نکلے
تری ناموس پر آقاْ ! رہیں گے سر بکف ہر دم
بدن سے آخری قطرہ نہ جس دم تک لہو نکلے
عمل ہو سیرتِ سرکارِ دو عالم پہ ہر لمحے
جلیل اب زندگانی کی یہی بس جُستجو نکلے