گجرے دروداں تے سلاماں دے بناوندے
گجرے دروداں تے سلاماں دے بناوندے
چلئے مدینے ولے روندے تے رُلاوندے
چھڈ دیئے قال تے مقال رہیے حال وچ
ڈُبے ہوئے چلئے مدینے دے خیال وِچ
دل نال دُکھڑے حضور نوں سناوندے
چلئے مدینے ولے روندے تے رُلاوندے
چھڈ کے خیال گھر بار تے جہان دا
اگو چیتا رکھئے حضور کول جان دا
گھر بار بُھل سارے طیبہ وچ جاوندے
چلئے مدینے ولے روندے تے رُلاوندے
آساں کدی اوہناں دیاں رہن ناں اُدھوریاں
جہناں تائیں طیبہ وچوں اون منظوریاں
طیبہ وچوں منگیاں مُراداں لوک پاوندے
چلئے مدینے ولے روندے تے رُلاوندے
رحمتاں دی طیبہ چ بہار لگی رہندی اے
سائلاں فقیراں دی قطار لگی رہندی اے
رب دے حبیب سینے ساریاں نوں لاوندے
چلئے مدینے ولے روندے تے رُلاوندے
دیندا اے مدینے والا نعمتاں نرالیاں
ٹھاری جان سینیاں نوں روضے دیاں جالیاں
صائم اوہ نظارے جاندے اکھاں چ سماوندے
چلئے مدینے ولے روندے تے رُلاوندے