گردشِ دوراں کا درماں جشنِ میلاد النبیؐ
گردشِ دوراں کا درماں جشنِ میلاد النبیؐ
ہے بہاراں در بہاراں جشنِ میلاد النبیؐ
جگمگا اٹھے ہیں بام و در بھی قلب و روح بھی
ہے ضیا پاش و گل افشاں جشنِ میلاد النبیؐ
رحمتہ للعالمیں کی آمد آمد کے طفیل
رحمت ِ ایزد کا عنواں جشنِ میلاد النبیؐ
ساتھ لاتا ہے ہوائیں انبساط و کیف کی
درد و غم میں راحتِ جاں جشنِ میلاد النبیؐ
لے کے آتا ہے ربیع الاوّل اک طرفہ بہار
حُسن کرتا ہے فراواں جشنِ میلاد النبیؐ
عنبریں اس سے ہیں گلیاں میری ارضِ پاک کی
نعت و سیرت کا گلستاں جشنِ میلاد النبیؐ
حق تعالیٰ کی خوشی اور قُرب آقاؐ کی سبیل
خیر اور تسکیں کا ساماں جشنِ میلاد النبیؐ