گنبدِ خضرا کی چاہت کا نشہ آنکھوں میں ہے
گنبدِ خضرا کی چاہت کا نشہ آنکھوں میں ہے
خوبصورت روشنی کا دائرہ آنکھوں میں ہے
ایک منزل دُور سے آواز دیتی ہے مجھے
ایک سیدھا اور سادہ راستہ آنکھوں میں ہے
رتجگوں کا نور پلکوں سے نہیں اُترا ابھی
لذتِ کیفِ مسلسل کا نشہ آنکھوں میں ہے
دیکھتا ہوں آئینے کو آئینے کی آنکھ سے
میری آنکھیں آئینے میں آئینہ آنکھوں میں ہے
ڈوبتے جاتے ہیں اس میں راستوں کے پیچ و خم
آنسوؤں کا جھلملاتا سلسلہ آنکھوں میں ہے
میں ابھی تک نیلگوں ماحول سے نکلا نہیں
حُسن میں ڈوبا ہوا اِک فاصلہ آنکھوں میں ہے