ہے دو جہاں میں محمدؐ کے نُور کی رونق
زمین و عرش بریں پہ حضورؐ کی رونق
شفق کا رنگ، ستاروں کی ضَو، قمر کی ضیا
حبیبِ پاکؐ کے نُور و ظہور کی رونق
نگاہِ ساقیِٔ کوثر کے فیض کا صدقہ
سمٹ گئی مرے ساغر میں طُور کی رونق
قدم قدم پہ ہے مستی حسیں خیالوں کی
نظر نظر میں ہے جامِ طہور کی رونق
کوئی مسافر طیبہ کی آنکھ سے دیکھے
غبارِ راہ کے کیف و سرور کی رونق
ظہوریؔ مدحتِ محببوبؐ کی نوازش ہے
مرے سخن میں ہے فکر و شعور کی رونق
شاعر کا نام :- محمد علی ظہوری
کتاب کا نام :- نوائے ظہوری