ہم سے عاصی مدینے بُلائے گئے
ہم سے عاصی مدینے بُلائے گئے
یعنی روتے ہوئے پھر ہنسائے گئے
جا کھڑے تھے مواجہ کے جب سامنے
خوب جی بھر کے آنسو بہائے گئے
دِل کی تختی پہ وہ مُرتسم ہو گئے
جو مناظر وہاں پر دِکھائے گئے
نام اُن کے جہاں میں امر ہو گئے
دار پر اُنْ کی خاطر جو لائے گئے
اُن کی چشمِ کرم ہے کہ گرداب سے
خوش مُقدّر کنارے لگائے گئے
روزِ محشر کا منظر بھیانک بہت
سو شِفاعت کے مُژدے سُنائے گئے
جن میں حلقے درودوں کے ہوتے رہے
بام و در اُن گھروں کے سجائے گئے
گو کہ طائف میں پتھر برستے رہے
ہاتھ پھر بھی دُعا کو اُٹھائے گئے
سو جلیل اپنی برزخ بھی آساں ہوئی
اُنکے جلوے لحد میں کرائے گئے