ہر گام اس پہ سایہء ربِّ جلیل ہے
ہر گام اس پہ سایہء ربِّ جلیل ہے
جس شخص کا وہ رحمتِؐ عالم کفیل ہے
اس بوریہ نشیں سے ہے رشتہ ہمارا بھی
دو ہجرتوں کی گرد سند ہے دلیل ہے
آشوبِ وقت کا ہے علاج آپ ہی کے پاس
سیلابِ غم کی زد پہ دلوں کی فصیل ہے
نسلوں پہ بھی محیط ہے، یہ حال اب حضور
جیسے گڑی ہوئی کوئی سینے پہ کیل ہے
یادِ نبیؐ ہو دل میں تو مشکل نہیں ہے کچھ
صحرا بھی مشتِ خاک، سمندر قلیل ہے
کیسے ہمارے حق میں نہیں ہوگا فیصلہ
ہم بے گھروں کا شاہِ مدینہ وکیل ہے