ہر طرف گونجی صدا جشنِ ربیع النور ہے
ہر طرف گونجی صدا جشنِ ربیع النور ہے
مرحبا صد مرحبا جشنِ ربیع النور ہے
چھائی رحمت کی گھٹا جشنِ ربیع النور ہے
مہکی مہکی ہے فضا جشنِ ربیع النور ہے
اپنے ہاتھوں کو اُٹھا جشنِ ربیع النور ہے
رد نہیں ہوگی دعا جشنِ ربیع النور ہے
رحمتِ عالم جنابِ مصطفےٰﷺ کی شان میں
ہیں سبھی نغمہ سرا جشنِ ربیع النور ہے
جس طرف بھی دیکھیے ہے عالمِ اسلام میں
شادمانی کی فضا جشنِ ربیع النور ہے
کُھل گئے رب کے خزانے مانگ لو جو چاہیے
ہو رہا ہے سب عطا جشنِ ربیع النور ہے
بے ادب ! اس کے سوا کوئی نہیں راہِ نجات
سر عقیدت سے جُھکا جشنِ ربیع النور ہے
بات ہے ایقان کی صدقہ عطا ہوگا ضرور
ہے عبث چوں و چرا جشنِ ربیع النور ہے
چل شفیقِؔ خوشنوا بہرِ سعادت پیش کر
نعتِ پاکِ مصطفےٰ ﷺ جشنِ ربیع النور ہے