حشر میں بھی یہ بھرم میرا بنائے رکھنا
حشر میں بھی یہ بھرم میرا بنائے رکھنا
حسبِ معمول مرے عیب چھپائے رکھنا
مجھ خطا کار کی نظریں ہیں تمہاریؐ جانب
یا نبیؐ رشتہ نبھاتے ہو، نبھائے رکھنا
ایک دن لائیں گے تشریف ہمارے آقاؐ
فرش پلکوں کا سرِ راہ بچھائے رکھنا
روشنی ہو گی ترے چاروں طرف محشر میں
ذکرِ سرکارؐ کی قندیل جلائے رکھنا
نعتِ سرکارؐ بھی ہو جائے گی ماشاء اللہ
آیتیں پڑھ کے سرِ بزم سنائے رکھنا
بارگاہِ شہِ والاؐ میں ادب سے جانا
سر بھی نظریں بھی ’’مواجہ‘‘ پہ جھکائے رکھنا
نذر کرنے ہیں درِ شاہِ اُممؐ پر جا کر
اپنے اشکوں کو تو اشفاقؔ بچائے رکھنا