ہم اس ادا سے شہرِ سرکار تک گئے ہیں

ہم اس ادا سے شہرِ سرکار تک گئے ہیں

آنکھوں سے ہر قدم پر سجدے چھلک گئے ہیں

---

ممکن نہ ہوسکی جب روضے پہ لب کشائی

پلکوں سے کچھ فسانے خود ہی ڈھلک گئے ہیں

---

سرکارؐ اب تو سن لیں فریاد عاصیوں کی

آہیں بھی تھک گئی ہیں آنسو بھی تھک گئے ہیں

---

غربت میں صبحِ طیبہ جب یا د آگئی ہے

فکر و نظر کی حد تک جادے چمک گئے ہیں

---

جس جس روش سے گزری سرکار کی سواری

گلشن تو پھر ہیں گلشن صحرا مہک گئے ہیں

---

جس سمت اُٹھ گئی ہیں رحمت مزاج نظریں

ماحول کی جبیں سے سجدے ٹپک گئے ہیں

---

آسان ان سے گزرے دیوانے مصطفیٰ کے

جن منزلوں میں اہل ِ دانش بھٹک گئے ہیں

---

اقبؔال کس نے چھیڑا یہ نعتیہ ترانہ

افسردہ انجمن میں شعلے لپک گئے ہیں

ہم اس ادا سے شہرِ سرکار تک گئے ہیں