اک چشمِ عنایت کے آثار نظر آئے
اک چشمِ عنایت کے آثار نظر آئے
جب مجھ کو تصور میں سرکار نظر آئے
پیکر تھے وفاؤں کے اصحابِ نبی سارے
آقا کی محبت میں سرشارنظرآئے
کیا جشن تھا طیبہ میں سرکار کی آمد پر
جی جان فدا کرتے انصار نظر آئے
طیبہ کی حسیں نگری پُر نور نظارے ہیں
گنبد وہ نظر آیا مینار نظر آئے
بے رنگ تھی یہ دنیا ظلمت کا بسیرا تھا
میلاد کی عید آئی انوار نظر آئے
ان جیسا حسیں کوئی عالم میں نہیں آیا
یوں تو کئی اللہ کے شہکار نظر آئے
اللہ نے یوں کی ہے توصیف محمد کی
آیات میں مدحت کے اظہار نظر آئے
اس ناز پہ آقا کے ہیں جود و عطا بے حد
جب دل سے پکارا تو غم خوار نظر آئے