اِلہام جامہ ہے ترا
اِلہام جامہ ہے ترا
قرآں عمامہ ہے تِرا
مِنبر تِرا عرشِ بریں
یَا رَحَمتہ الِّلعَالَمِیں
آئینۂِ رحمت بدن‘ سانسیں چراغِ عِلم و فن
قُربِ الٰہی تیرا گھر الفقرُ فخری تیرا دھن
خُوشبو تِری جوئے کرم
آنکھیں تِری بابِ حَرم
نُورِ ازل تیری جبیں
یَا رَحَمتہ الِّلعَالَمِیں
تیری خموشی بھی اذاں‘ نِیندیں بھی تیریِ رَت جگے
تیری حیاتِ پاک کا‘ ہر لمحہ پیغمبر لگے
خیر البشر رُتبہ تِرا
آوازِ حق خُطبہ تِرا
آفاق تیرے سامِعیں
یَا رَحَمتہ الِّلعَالَمِیں
قبضہ تِری پرچھائیں کا‘ بِینائی پر اِدراک پر
پَیروں کی جنبش خاک پر اور آہٹیں اَفلاک پر
گردِ سفر‘ تاروں کی ضَو
مرکب‘ براقِ تیز رَو
سائیس‘ جبریلِ امیں
یَا رَحَمتہ الِّلعَالَمِیں
تُو آفتابِ غار بھی تُو پرچمِ یَلغار بھی
عجز و وفا بھی پیار بھی‘ شہ زور بھی سالار بھی
تِری زرہ‘ فتح و ظفر
صِدق و صفا‘ تِری سپر
تیغ و تبر‘ صَبر و یقیں
یَا رَحَمتہ الِّلعَالَمِیں
پھِر گدڑیوں کو لعل دے‘ جاں پتّھروں میں ڈال دے
حاوی ہوں مستقبل پہ ہم‘ ماضی سا ہم کو حال دے
دعویٰ ہے تیری چاہ کا
اِس اُمّتِ گمراہ کا
تیرے سَوا کوئی نہیں
یَا رَحَمتہ الِّلعَالَمِیں