ایمان کو ثبات ہے ذاتِ رسولؐ سے
ایمان کو ثبات ہے ذاتِ رسولؐ سے
روشن یہ کائنات ہے ذاتِ رسولؐ سے
ہر اک خیال جانبِ طیبہ رواں دواں
بزمِ تصورات ہے ذاتِ رسولؐ سے
دل سے ہر ایک خواہشِ دُنیا نکل گئی
پایا وہ اِلتفات ہے ذاتِ رسولؐ سے
پُرسانِ حال کوئی نہیں آپؐ کے سوا
بنتی ہماری بات ہے ذاتِ رسولؐ سے
اُنؐ کا وجود باعثِ تسکینِ قلب و جاں
ہر رنج و غم کو مات ہے ذاتِ رسولؐ سے
ہر آنکھ کا نکھار ہے طیبہ کی روشنی
تنہائی سے نجات ہے ذاتِ رسولؐ سے
ہر پھول ہو رہا ہے مدینے سے فیضیاب
مہکی یہ کائنات ہے ذاتِ رسولؐ سے
حرکت میں ہیں زمین و فلک اور شش جہات
کونین کی حیات ہے ذاتِ رسولؐ سے
توصیفِ مصطفیؐ سے ملی عزت و وقار
اشفاقؔ میری ذات ہے ذاتِ رسولؐ سے