جس کو دیارِ عشق کی منزل نہیں قبول
جس کو دیارِ عشق کی منزل نہیں قبول
اُس کا ہر ایک دعوٰی ہے باطِل، نہیں قبول
دل میں خُداُ کی یاد ہو یا مُصطفٰےْ کی یاد
دل گر ہوا ہو دونوں سے غافل، نہیں قبول
رونق ہر ایک بزم کی ذکرِ نبی سے ہے
جس میں نہیں ہے ذکر وہ محفِل نہیں قبول
عشق و وفا کا آپ سے، دعوٰی تو ہو مگر
پھر بھی رہے وہ غیر سے واصِل،نہیں قبول
اپنے تئیں تو ہو بڑا عالِم مگر جسے
اُن کی نہیں شناس وہ جاہل نہیں قبول
جس کو درِ رسول کا پاسِ ادب نہ ہو
ایسا کوئی بھی عالِم و فاضِل نہیں قبول
جس کی نظر میں بس گیا طیبہ نگر کا چاند
اُس کو فلک کا پھر مہِ کامل نہیں قبول
اعمال کی کسوٹی ہے سُنّت رسول کی
سنت سے منحرف ہے جو عامِل، نہیں قبول
جو منصبِ قضا پہ نہیں عدل کر سکا
اللہ ﷻ کے حضور میں عادِل نہیں قبول
نافع نہیں ہے علم جو مخلوق کے لئے
ایسے کسی بھی عِلم کا حامِل نہیں قبول
جس میں خیالِ ارضِ مدینہ نہ ہو جلیل
اللہ ﷻ کو بھی وہ دلِ غافل نہیں قبول