جو پست پست کیا عاصیوں کو وحشت نے
جو پست پست کیا عاصیوں کو وحشت نے
تو مست مست کیا مصطفیٰ کی رحمت نے
حبیب دو ہوں تو محبوبیت کا کیا مطلب
بنایا دوسرا احمد نہ دستِ قدرت نے
ہزاروں سجدے کریں ان کی ذات کو کم ہے
ہمیں تو باندھ دیا ان کی ہی شریعت نے
تمہاری دوستی اور دشمنی ہو حق کے لیے
ہمیں سکھایا یہی ہے کتاب و سنّت نے
منیٰ میں موت کو میں نے قریب سے دیکھا
بچایا مجھ کو مرے مرشدوں کی نسبت نے
مفادِ ذات کی خاطر کسی سے کچھ مانگوں
کبھی کیا نہ گوارا یہ میری غیرت نے
کمال ہے کہ بریلی کے خان زادوں کو
فروغ بخشا ہے مارہرہ کی سیادت نے
کہاں رسول کی مدحت کہاں قلم میرا
سلیقہ بخشا مجھے روحِ اعلیٰ حضرت نے
تمھاری نعتوں کا انداز منفرد نظمی
کمال کر دیا کلکِ رضا کی برکت نے