کامل ہو نہ کیوں دانش و عرفان محمد
کامل ہو نہ کیوں دانش و عرفان محمد ﷺ
ہر چیز کا تبیان ہے قرآنِ محمد ﷺ
ثُعبان کلیمی نے تو کھائےتھے فقط سانپ
امت کے گنہ کھاتا ہے شَعبانِ محمد ﷺ
بدّو پہ بھی پڑ جائے اگر چشمِ عنایت
کہہ اٹھے زمانہ اسے لقمانِ محمدﷺ
اس شمع کمالات کا پروانہ ہے کردار
ہے بلبلِ گفتار ثنا خوانِ محمد ﷺ
معروف ہے وہ مژدہ کہ " آزاد ہو تم سب "
مشہور ہے " صِل قاطِعَ " فرمانِ محمد ﷺ
کربل سے عیاں نقشۂ فردوس بریں ہے
گلزارِ گرِ دشت ہے ریحانِ محمد ﷺ
برہانِ الٰہی ہیں محمد تو معظمؔ
اور میرے رضا خان ہیں برہان محمدﷺ