کس قدر مانوس ہیں سارے پیمبر آپؐ سے
کس قدر مانوس ہیں سارے پیمبر آپؐ سے
قطرہ قطرہ مانگتے ہیں یہ سمندر آپؐ سے
روشنی پھیلی ہوئی ہے آپؐ کے صدقے تمام
دوجہانوں کے ہیں بام و در منور آپؐ سے
آسمانوں میں ملے گی وہ نہ کعبے میں کبھی
جو محبت کر گئے صدیقِ اکبر آپؐ سے
چاندنی سے بڑھ کے دلکش آپؐ کے قدموں کی دھول
چاند سورج کی ضیا پاشی ہے کمتر آپؐ سے
کتنی دنیاؤں کو بخشی ہیں ضیائیں آپؐ نے
وسعتیں پاتے ہیں جانے کتنے ساگر آپؐ سے
جانے کتنی کہکشائیں آپؐ سے منسوب ہیں
منسلک ہیں خوبصورت کتنے منظر آپؐ سے