کس قدر تھا احترامِ باریابی دیکھیے
کس قدر تھا احترامِ باریابی دیکھیے
گوش بر آواز رہتے تھے صحابی دیکھیے
آسماں کے چاند کو خاطر میں وہ لاتا نہیں
ذرّۂِ طیبہ کے تیور آفتابی دیکھیے
نسبتِ سرکار سے ممتاز کتنی ہو گئی
حضرتِ مولا علی کی بو ترابی دیکھیے
ہے کلام اللہ کی تفسیر بھی لکھی ہوئی
مصطفےٰ کا روئے انور ہے کتابی دیکھیے
پھر چلے آئے جنابِ مصطفےٰ کس شان سے
خانۂِ کعبہ میں شانِ فتحیابی دیکھیے
کیا پتہ کب ہو تمنا پوری ان کی دید کی
کب سکوں پائے طبیعت اضطرابی دیکھیے
پڑھ کے روز و شب شفیقؔ اُن پر درودِ غوثیہ
زندگی کے مرحلوں میں کامیابی دیکھیے