کسے معلوم ہے کتنی بلندی پر ہے مقام اُسؐ کا
کسے معلوم ہے کتنی بلندی پر ہے مقام اُسؐ کا
یہ کیا کم ہے کہ ہے مولا عمر جیسا غلام اُسؐ کا
علی شیر خدا جیسے بچھے جاتے ہیں قدموں میں
ادب سے نام لیتے ہیں فرشتے صبح و شام اُس کا
زمیں کے رہنے والوں پر عیاں ہیں عظمتیں اُسؐ کی
لکھا ہے آسمانوں پر لقب خیر الانام اُسؐ کا
صداقت کے سوا کھلتی نہیں ہرگز زباں اُسؐ کی
اُتر جاتا ہے خوشبو کی طرح دل میں کلام اُسؐ کا
فرشتے اُس کے دروازے پہ دستک دینے آتے ہیں
جسے وہ یاد فرمائے ، جسے پہنچے سلام اُسؐ کا
بڑائی اور اچھائی کی چلی ہے بات جب انجؔم
خدا کے بعد آیا ہے زباں پر صرف نام اُسؐ کا