کوئی گھڑی ہو کوئی ہو موسم درود تجھؐ پر سلام تجھ ؐپر
کوئی گھڑی ہو کوئی ہو موسم درود تجھؐ پر سلام تجھ ؐپر
رہے ہمارے لبوں پہ ہر دم درود تجھؐ پر سلام تجھؐ پر
درود سے زندگی ملی ہے سلام سے روشنی ملی ہے
یہی وظیفہ ہے اسمِ اعظم درود تجھؐ پر سلام تجھؐ پر
تریؐ محبت تریؐ عنایت تراؐ کرم اور تیریؐ چاہت
رہے ہمیشہ انیس و ہمدم درود تجھ ؐ پر سلام تجھؐ پر
قرارِ جاں تیراؐ نامِ نامی اسی سے مٹتی ہے تشنہ کامی
مٹا دیا میرے دل سے ہر غم درود تجھؐ پر سلام تجھؐ پر
تریؐ غلامی شعار کرلوں اطاعتیں اختیار کر لوں
رہے جبیں تیرےؐ سامنے خم درود تجھؐ پر سلام تجھ ؐ پر
گھڑی گھڑی اور لمحہ لمحہ گلی گلی اور قریہ قریہ
بلند رہتا ہے تیراؐ پرچم درود تجھؐ پر سلام تجھ ؐ پر
زوال برگ و شجر پہ آئے زوال شمس و قمر پہ آئے
عروج تیراؐ رہے گا پیہم درود تجھ ؐ پر سلام تجھ ؐ پر
قبول کیجے سلام میرا ہے ملتمس یہ غلام تیراؐ
شفیعِ محشرؐ نبیء اکرمؐ درود تجھؐ پر سلام تجھؐ پر