کوئی کہیں ہو اگر آپؐ کی نگاہ میں ہے
کوئی کہیں ہو اگر آپؐ کی نگاہ میں ہے
خُدا کے بعد وہ سب سے بڑی پناہ میں ہے
جوارِ امن میں ہے راستی کی راہ میں ہے
جو قلب سایۂ دامانِ دیں پناہ میں ہے
نہ یہ جمال کسی کے جلال میں دیکھا
نہ ایسا عجز کسی بھی جہاں پناہ میں ہے
تمام کون و مکاں اُنؐ کی مملکت کے نشان
جہانِ بُود و نبُود اُنؐ کی بارگاہ میں ہے
جو وہؐ بلائیں تو پہنچوں جو وہؐ سُنیں تو کہُوں
ابھی تو ذوقِ طلب حسرتوں کی راہ میں ہے
یہ اور کِس سے کہُوں میں کہ حسرتِ دیدار
مسافروں کی طرح مدتوں سے راہ میں ہے
حضُورؐ اذنِ حضُوری ملے تو عرض کریں
ہمارا حال عجب حالتِ تباہ میں ہے
شعُورِ فکر سے محرُوم اُمّتِ مرحُوم
حِصار ذات سے نکلی تو خانقاہ میں ہے